Адыгэбзэмрэ адыгэ литературэмрэ я мазэ

Мазаем (февраль мазэм)  и кIэм къыщыщIэдзауэ гъатхэпэ (март) мазэм и 15 пщIондэ ди еджапIэм щекIуэкIащ адыгэбзэмрэ адыгэ литературэмрэ я мазэр. Абы жыджэру хэтахэщ  5-11-нэ классхэм щеджэхэр.

ЕгъэджакIуэ Лыхь Л.Хь. иригъэкIуэкIащ дерс зэIухахэр: «ЩыIэцIэм и дунейм» -  5-нэ классым, «ЦIыхумрэ хьэмрэ» (литературэмкIэ) – 6-нэ «б» классым,   «Хэт анэкIэ узэджэнур?» (литературэмкIэ)  - 8-нэ классым,  «ЩIыуэпсым и хъумакIуэхэм я хасэ» ( классщIыб лэжьыгъэ) 8-10-нэ классхэм.

5-нэ классым щекIуэкIа дерс зэIухам къытрагъэзэжащ щыIэцIэ унейхэмрэ зэдайхэмрэ, егъэджакIуэм яхуигъэхьэзыра презентацэмкIэ зэрагъэцIыхуащ ди республикэм  щыщ цIыху цIэрыIуэхэмрэ ди лъахэм щIыпIэ хьэлэмэту иIэхэмрэ. Ахэм я цIэ-унэцIэхэр, щIыпIэцIэхэр инкIэ зэратхыр иджыри зэ къапщытэжащ.

Дерсыр гъэщIэгъуэн, щIэщыгъуэ ящIащ еджакIуэхэм папщIэ егъэджакIуэм къызэригъэпэща джэгукIэхэмрэ зэпеуэхэмрэ.

«ЦIыхумрэ хьэмрэ»  фIэщыгъэцIэр иIэу литературэмкIэ 6-нэ «б» классым екIуэкIа дерс зэIухам еджакIуэхэм и гугъу щащIащ хьэр цIыхум ныбжьэгъу къызэрыхуэхъуам, хьэр цIыхум зэрыхуэщхьэпэр, ар мафIэс, зауэ, нэгъуэщI гузэвэгъуэхэм дежи цIыхум къызэригъэсэбэпыр. ЖаIахэр литературэм ирапхыжащ.

ЕджакIуэхэм егугъуу дерсым зызэрыхуагъэхьэзырар нэрылъагъут: ахэм ящIащ тхылъ цIыкIухэр, презентацэхэр, хьэм теухуауэ усэ къеджахэщ, таурыхъ, хъыбархэр жаIэжащ.

«Хэт анэкIэ узэджэнур?»  - литературэмкIэ - 8-нэ классым щекIуэкIа дерс зэIухам лъабжьэ хуэхъуар еджакIуэхэм иджыблагъэ яджа «Анэ» рассказырщ. Дерсыр иухыху, еджакIуэхэр телэжьащ абы и пэщIэдзэм егъэджакIуэм къахуигъэува упщIэм: хэт анэкIэ узэджэнур – сабийр дунейм къытезыгъэхьара хьэмэрэ зыпIара? ЕджакIуэхэм адыгэбзэ шэрыуэ зэраIурылъыр, ягу илъыр я псалъэкIэ къызэраIуатэм удихьэхырт.

Мыпхуэдэ дерсхэм гъэсэныгъэ мыхьэнэшхуэ  яIэщ.

«ЩIыуэпсым и хъумакIуэхэм я хасэ»  -  классщIыб лэжьыгъэ хьэлэмэт ягъэлъэгъуащ  8-10-нэ классхэм щIэс еджакIуэхэм. «Пластикымрэ нобэрей дунеймрэ» - арат егъэджакIуэм темэу къищтар.  Лэжьыгъэр зэпеуэ-зэдауэм тету къызэгъэпэща хъуащ. А зэдауэм хэтащ «хасэм и гуащэр», «экспертыр», «тхыдэтхыр», «дохутырыр», «экологыр», «статистыр», «къуажэ администрацэм и Iэтащхьэр», «унэгуащэр». Пластикыр сэбэп? Зэран? Зэранмэ, ар ди гъащIэм тхухэгъэкIыну? Мыпхуэдэ упщIэхэмкIэ зодауэр хасэм хэтхэр. Ахэм жаIа псоми гупсысэ узыншэ къыхехыжыр экспертым: пластикыр зэранщ, гъащIэмрэ узыншагъэмрэ и бийщ Ар ди гъащIэм хэхын, е, нэгъуэщI мыхъуми, нэхъ мащIэ щIын хуейщ.

ЕгъэджакIуэ Бей М.И. иригъэкIуэкIащ дерс зэIухахэр: «Глагол»   - 6-нэ классым, «Лъэпкъым и къуэпсхэр» (литературэмкIэ)  - 7-нэ классым, «Си хъуреягъкIэ» (литературэмкIэ)   - 11-нэ классым; «Адыгэбзэр пщIэн хуейщ!»

(Дебаты на кабардинском языке,  классщIыб лэжьыгъэ) - 11-нэ классым.

6 - нэ «а» классым щекIуэкIа дерсыр глаголым теухуауэ щытащ. Ар глагол темэмкIэ яджа псори къапщытэж къудейуэ мыхъуу, гъэщIэгъуэну къызэгъэпэща хъуащ: егъэджакIуэм къигъэсэбэпащ езы сабийхэм ягъэхьэзыра проект лэжьыгъэ цIыкIухэр. Дерсыр ягъэдэхащ зэпеуэхэмрэ еджакIуэхэр къызэджа усэ цIыкIухэмрэ.

11-нэ классым щекIуэкIа дерс зэIухам еджакIуэхэм къапщытэжащ Хьэх Сэфарбий и гъащIэмрэ и литературнэ лэжьыгъэмрэ (презентацэ къагъэсэбэпу), «Си хъуреягъкIэ»  жиIэу абы итха тхыгъэ кIэщI цIыкIухэм щыщхэм гукIэ къеджащ, Хьэхым и тхыгъэхэм гъэсэныгъэ, ущииныгъэ мыхьэнэ куу зэрыщIэлъым и гугъу ящIащ. ЕгъэджакIуэм хузэфIэкIащ а тхыгъэхэм теухуауэ зэдауэ къигъэхъейурэ еджакIуэхэр езыр-езыру гупсысэ пэжым хуигъэкIуэну.

«Адыгэбзэмрэ адыгэ литературэмрэ я мазэм» нэхъ жыджэру зыкъагъэлъэгъуащ мыпхуэдэ еджакIуэхэм: Гугъуэт Мадинэ, Мурзэкан Индирэ, Щоджэн Самирэ, Дзэмыхь Ильяс, Мурзэкъан Эльвирэ, Маргъущ Аделинэ, Маргъущ Самирэ, Гугъуэт Даянэ, нэгъуэщIхэми.

Абы нэмыщI, гъатхэпэм и 13-м Дунейпсо Iуэрытхми (тотальнэ диктанткIэ дызэджэм) езым я гукъыдэжкIэ хэтащ предмет зэмылIэужьыгъуэхэмкIэ езыгъаджэхэри, еджакIуэхэри, адэ-анэхэри.

А псор зытеухуэжар щIэблэ къыдэк1уэтейм адыгэбзэр ищIэу, фIыуэ илъагъуу къыдэкIуэтеинырщ.

 «ЩыIэцIэм и дунейм» -  5-нэ классым щекIуэкI дерс зэIухам хэту еджакIуэхэр дихьэхыу мэджэгу псалъэрыджэгу.

5-нэ классым и еджакIуэ ДзекIуэрей Кристинэ адыгэбзэм теухуа блын газетым топсэлъыхь

 5-нэ классым щеджэ еджакIуэхэм «Си бзэ – си псэ, си дуней» уэрэдыр ягъэзащIэ

 7-нэ классым я къэфакIуэхэм утыкур ягъэбжьыфIэ

 «Лъэпкъым и къуэпсхэр» дерс зэIухам щыщ теплъэгъуэхэр.